Muaji maj i vitit 2026 është klasifikuar si i dyti më i ngrohti në nivel global, duke përfshirë sipërfaqet tokësore dhe ato detare. Këto të dhëna u bënë publike përmes buletinit më të fundit të Shërbimit të Ndryshimeve Klimatike Copernicus dhe u konfirmuan nga Bashkim Kastrati i Institutit Hidrometeorologjik të Kosovës (IHMK).
Sipas raportit, kontinenti evropian përjetoi një kalim të shpejtë klimaterik, duke lënë pas kushtet më të freskëta se mesatarja për t'u përballur me një valë nxehtësie intensive dhe të hershme. Shtetet që regjistruan majin e tyre më të nxehtë në histori janë:
• Franca
• Britania e Madhe
• Irlanda
• Portugalia
Përveç rritjes së temperaturave, raporti evidentoi një kontrast klimatik në kontinent. Ndërsa pjesë të mëdha të Evropës perëndimore, qendrore dhe lindore përjetuan periudha me mot më të thatë se mesatarja, në Turqi, Bullgari dhe Moldavi u raportuan përmbytje të gjera si pasojë e fenomeneve ekstreme atmosferike.