Kylian Mbappé, sulmuesi i Real Madridit, në një intervistë për Globo Esporte shprehu dëshirën për të parë Neymarin sërish me fanellën e Brazilit në Botërorin 2026.
Të dy lojtarët, ish-shokë skuadre te Paris Saint-Germain, nuk do të përballen në miqësoren mes Francës dhe Brazilit, pasi Neymari nuk është ftuar nga trajneri Carlo Ancelotti. Pavarësisht kësaj, Mbappé nuk ka dyshime për rikthimin e tij në kombëtare.
Ai deklaroi: “Mendoj se Brazili mund të përfaqësohet si nga Vinicius ashtu edhe nga Neymar. Vini duhet ende ta bëjë një hap me kombëtaren, por Neymar është Neymar: një nga më të mëdhenjtë. Nuk e imagjinoj një Botëror pa të.”
Këto fjalë nënvizojnë rolin e Neymarit, ish-lojtarit të Santos, në skenën ndërkombëtare, pavarësisht problemeve fizike në 30 muajt e fundit. Mbappé shtoi: “Kam luajtur me të dhe kam mësuar shumë. E di si punon: do të përgatitet në mënyrën më të mirë dhe do të jetë aty. Megjithatë i respektoj zgjedhjet e Ancelottit.”
Sa i përket sfidës kundër Brazilit, Mbappé theksoi: “Nuk mund të jesh kurrë favorit kundër një skuadre me pesë yje në fanellë. Brazili është kombi më i madh i futbollit në histori. Për ne është një test i rëndësishëm për ta treguar vlerën tonë dhe për t’u përgatitur për Botëror.”