Ministria e Infrastrukturës dhe Energjisë prezantoi Strategjinë Kombëtare Minerare 2026–2040 gjatë një takimi në Tiranë më 12 maj. Ky dokument afatgjatë synon transformimin e industrisë nxjerrëse në një sektor modern, të qëndrueshëm dhe të integruar me tregun e Bashkimit Evropian.
Strategjia mbështetet në tre dokumente kryesore: NSDI 2030, Aktin Evropian për Lëndët e Para Kritike (CRMA – Rregullorja BE 2024/1252) dhe Strategjinë Kombëtare të Specializimit të Mençur 2025–2030, duke orientuar sektorin drejt inovacionit, dixhitalizimit dhe teknologjive të gjelbra.
Drejtori i Drejtorisë së Programeve dhe Zhvillimit të Industrisë dhe Minierave, Dhori Dapi, deklaroi se strategjia jep një drejtim të qartë dhe afatgjatë industrisë minerare shqiptare, në përputhje me standardet evropiane. Ajo synon rritjen e vlerës së shtuar, forcimin e eksplorimit gjeologjik dhe modernizimin teknologjik në funksion të lëndëve të para kritike.
Prioritetet kryesore të strategjisë
• Rritja e eksplorimit dhe rivlerësimi i rezervave minerale;
• Zhvillimi i kapaciteteve për përpunim dhe rafinim brenda vendit;
• Rikuperimi i metaleve nga mbetjet historike minerare;
• Dixhitalizimi i plotë i të dhënave gjeologjike;
• Forcimi i sigurisë teknike në industri;
• Mbrojtja e mjedisit dhe ulja e emetimeve të gazrave serrë;
• Rigjallërimi i arsimit profesional dhe i kërkimit shkencor në gjeologji dhe miniera.
Sipas Dapi, strategjia pozicionon Shqipërinë si qendër rajonale për mineralet strategjike, duke mbështetur tranzicionin e gjelbër dhe furnizimin e qëndrueshëm me lëndë të para për ekonominë evropiane.