Ministri për Evropën dhe Punët e Jashtme, Ferit Hoxha, i cili ndodhet në Ankara të Turqisë për të marrë pjesë në Samitin e 36-të të NATO-s, zhvilloi një takim dypalësh me ministren e Punëve të Jashtme të Kanadasë, Anita Anand.
Në fokus të bisedimeve ishte intensifikimi i dialogut politik dhe nxitja e bashkëpunimit në sektorët e ekonomisë dhe tregtisë. Si një hap konkret për forcimin e marrëdhënieve, ministrat veçuan rëndësinë e nisjes së fluturimeve direkte midis Tiranës dhe Torontos, që do të lehtësojnë shkëmbimet midis qytetarëve të të dyja vendeve.
Gjatë takimit u shqyrtua edhe iniciativa për krijimin e Bankës së Mbrojtjes, Sigurisë dhe Qëndrueshmërisë, e konceptuar si një mekanizëm financiar shumëpalësh për zhvillimin e aftësive mbrojtëse. Në një reagim në rrjetin social X, ministri Hoxha vlerësoi se ky mekanizëm do të kontribuojë në avancimin e objektivave të përbashkëta të aleatëve.
Përveç çështjeve dypalëshe, delegacionet shkëmbyen mendime mbi situatën e sigurisë në kontinentin evropian, duke rikonfirmuar mbështetjen e palëkundur ndaj Ukrainës.