Ministria e Industrisë, Tregtisë, Ndërmarrësisë dhe Inovacionit (MINTI) reagoi për aksionin e zhvilluar mëngjesin e së mërkurës në Agjencinë për Regjistrimin e Bizneseve (ARBK) në Prishtinë nga Prokuroria Themelore në Prishtinë dhe Policia e Kosovës, konkretisht njësitë për krime ekonomike.
Aksioni lidhet me hetimet për ndryshimin e pronësisë së një biznesi pas ndërrimit të jetës së pronarit. Sipas MINTI-së, stafi i ARBK-së, pas shqyrtimit të dokumentacionit dhe vendimeve gjyqësore relevante, konstatoi muaj më parë një keqinterpretim të një aktgjykimi gjyqësor. Ky interpretim u korrigjua përmes procedurave përkatëse ligjore dhe administrative.
Ministria dhe ARBK-ja mbeten të përkushtuara për bashkëpunim me organet e rendit dhe drejtësisë, me qëllim zbardhjen e plotë të rastit. MINTI siguron qytetarët se institucionet po punojnë për ngritjen e sistemeve në ARBK, me synim rritjen e transparencës, saktësisë së informacionit dhe sigurisë juridike për qytetarët dhe bizneset.
MINTI do të vazhdojë të njoftojë opinionin publik për zhvillimet e mëtejshme. Ndryshe, sipas disa burimeve, gjatë aksionit u shoqëruan për intervistim tre zyrtarë të ARBK-së, përfshirë ushtruesen e detyrës së kryeshefit. Hetimet përfshijnë dyshime për keqpërdorim të pozitës apo autoritetit zyrtar dhe raste të posaçme të falsifikimit të dokumenteve.