Në Spitalin e Përgjithshëm “Dr. Sami Haxhibeqiri” në Mitrovicë, mjekët kanë kryer me sukses një intervenim kirurgjik të ndërlikuar. Pacientja me inicialet Sh.K., e lindur në vitin 1968, u pranua në repartin e Kirurgjisë për shkak të dhimbjeve të forta në bark, fryrjes së tij dhe pengesave serioze në tretje, përfshirë obstipacionin.
Pas ekzaminimeve të detajuara imazherike dhe laboratorike, ajo u diagnostikua me tumor permagna abdominis me peshë rreth 4 kilogramë, si dhe me peritonitis serosa, që është inflamacion i membranës së barkut me grumbullim lëngu. Për shkak të rrezikut të lartë dhe përmasave të mëdha të masës tumorale, ekipi mjekësor vendosi për ndërhyrje të menjëhershme kirurgjike.
Operacioni përfshiu heqjen e plotë të tumorit, eksplorimin e zgavrës së barkut, pastrimin e saj dhe vendosjen e drenazhit. Masa tumorale u hoq plotësisht, duke rikthyer funksionet vitale të pacientës dhe duke eliminuar rrezikun për jetën e saj. Aktualisht, ajo ndodhet në gjendje stabile shëndetësore, ndërsa tumori është dërguar për ekzaminim histopatologjik në Institutin e Patologjisë në QKUK.
Ndërhyrja u realizua nga një ekip multidisiplinar, me kirurgët abdominalë Dr. Fatbardh Rexha dhe Dr. Linda Uka-Musa, anesteziologun Dr. Veton Pllana, si dhe instrumentarët, teknikët e anestezionit dhe infermierët e repartit. Ky rast konsiderohet i rrallë për shkak të madhësisë së tumorit dhe kompleksitetit të operacionit.
Përditësime
Ekipi mjekësor në Mitrovicë përfshinte instrumentarët Ferdane Bulliqi dhe Nerxhihane Çuni, teknikët e anestezionit Naser Spahiu dhe Besarta Mehmeti, si dhe infermierët Alma Musa, Besmire Mustafa dhe Rafet Bahtiri.
Mjekët në Mitrovicë konfirmuan se operacioni zgjati 3 orë e gjysmë deri në 4 orë.
Pacientja 58-vjeçare pritet të lëshohet nesër në shtëpi.
Dr. Fatbardh Rexha, kirurgu kryesor, tha: "Operacioni paraqiti sfida të mëdha për shkak të madhësisë dhe kompleksitetit të tumorit, por puna ekipore dhe angazhimi i stafit e sollën suksesin."