Ganimete Musliu, deputete e Partisë Demokratike të Kosovës, vizitoi Lumnije Thaçin, bashkëshorten e ish-presidentit Hashim Thaçi, në Ditën Ndërkombëtare të Gruas më 8 Mars.
Musliu bëri të ditur vizitën përmes një postimi në Facebook. Ajo shkroi se në këtë ditë të veçantë kujtuan së bashku sakrificat, guximin dhe qëndresën e grave shqiptare ndër breza.
Në postim, Musliu theksoi se gratë shqiptare, pavarësisht sfidave ekonomike, shoqërore dhe dhunës, kanë mbetur shtylla të familjes, bashkëshorte të devotshme, nëna të përkushtuara dhe partnere të palëkundura në përpjekjet kombëtare. Historia dhe tradita shqiptare dëshmojnë respektin ndaj grave, madje edhe në kohë lufte dhe rezistence.
Ajo shtoi se kërkesa e grave për barazi dhe trajtim dinjitoz është e drejtë legjitime që shoqëria duhet ta njohë dhe mbrojë. Në këtë ditë simbolike, nderuan gratë që kanë kontribuar për familjen, komunitetin dhe lirinë e kombit. Fuqizimi, arsimimi dhe barazia e tyre janë detyrë e përhershme e secilit.
Musliu përfundoi duke thënë se gruaja shqiptare mbetet simbol i forcës, guximit, intelektualitetit dhe dashurisë për atdheun, e tillë është edhe Lumnije Thaçi. Në postim, ajo e cilësoi Hashim Thaçin si "presidentin Thaçi i cili padrejtësisht po mbahet i burgosur në Hagë".