Avokati i Popullit, Naim Qelaj, ka shprehur rezerva të forta në lidhje me mënyrën e funksionimit të Dhomave të Specializuara të Kosovës në Hagë. Sipas tij, caktimi i paneleve gjyqësore bëhet përmes një vendimi autonom të kryetares, proces ky që mungon në kontroll dhe kritere të qarta, duke cenuar besueshmërinë dhe pavarësinë e të gjithë procesit.
Qelaj theksoi se këto shqetësime i ka ngritur edhe në të kaluarën, ndërsa vuri në dukje se mangësi të tilla janë evidentuar edhe në një raport të palës britanike. Një ndër çështjet më të ndjeshme, sipas Qelajt, është roli i kryetares së Dhomave të Specializuara. Ai deklaroi se ajo ka marrë pjesë në takime ku është diskutuar për dënimin e të dyshuarve ende pa filluar procedurat gjyqësore, duke aluduar madje edhe në dënime me burgim të përjetshëm.
Përballë këtyre konstatimeve, Avokati i Popullit u ka bërë thirrje institucioneve ndërkombëtare, përkatësisht Këshillit të Evropës dhe Bashkimit Evropian, që të ndërhyjnë. Qelaj paralajmëroi se, nëse nuk ndërmerren masa, procesi rrezikon të shmanget nga respektimi i standardeve minimale dhe nuk do të mund të garantojë respektimin e të drejtave themelore apo një proces të drejtë gjyqësor.