Inspektorati Qendror i Punës ka realizuar 32 inspektime në sektorin e ndërtimtarisë gjatë 48-orëve të fundit në të gjithë territorin e Kosovës. Ky aksion përbën ditën e 14-të të inspektimeve të jashtëzakonshme në sektorët me rrezikshmëri të lartë, në zbatim të vendimit të Ministrisë së Punës, të dhënë më 13 prill nga Ministri Andin Hoti.
Si rezultat i këtyre inspektimeve, punimet janë ndaluar në 14 vendpunishte të ndërtimtarisë për shkelje të konstatuara në sigurinë dhe shëndetin në punë. Në 21 raste të tjera janë shqiptuar vërejtje për parregullsi. Subjektet me ndalim të punimeve do të procesohen automatikisht në gjykata për kundërvajtje lidhur me shkeljet e evidentuara.
4 raste janë proceduar në Polici, pasi punëdhënësit ose investitorët kanë vazhduar punimet në kantier duke mos respektuar vendimin e inspektorëve për ndalim dhe duke dëmtuar shiritin ndalues. Riinspektimet do të kryhen në ditët në vijim për të verifikuar eliminimin e parregullësive nga subjektet e inspektuara.
Vetëm këtë vit në Kosovë kanë humbur jetën 10 punëtorë në sektorin e ndërtimtarisë.