Një ngjarje që mund të kishte përfunduar tragjikisht është regjistruar në plazhin e Velipojës, ku ndërhyrja e shpejtë e vrojtuesit shmangu humbjen e jetës së një pushuesi 67-vjeçar.
Sipas informacioneve, pushuesi u nxor nga uji në gjendje kritike, pa puls dhe pa frymëmarrje. Vrojtuesi Besfort Gjoklaj ndërhyri menjëherë, duke kryer manovrat e reanimimit kardiopulmonar (CPR) në breg të detit. Si rezultat i kësaj ndërhyrjeje profesionale, pushuesi arriti të rifitonte shenjat jetësore.
Pas stabilizimit fillestar, i moshuari iu dorëzua ekipit të Urgjencës, i cili e dërgoi drejt spitalit për trajtim të mëtejshëm mjekësor. Kjo ngjarje nxjerr në pah rëndësinë e pranisë së personelit të specializuar të shpëtimit në zonat bregdetare gjatë sezonit turistik.