Në vitin 2025, Shqipëria importoi afro 100 mijë automjete, sipas të dhënave të Drejtorisë së Transportit Rrugor. Kjo shifër përfaqëson një rritje me rreth 1 mijë njësi krahasuar me vitin 2024. Gjysma e këtyre automjeteve u regjistruan për herë të parë në kryeqytet.
Automotorizimi vijon të shënojë rritje në Shqipëri. Të dhënat zyrtare tregojnë se në vend qarkullojnë 33 lloje automjetesh, shumica e tyre makina. Vetëm në muajin dhjetor hynë 9 mijë e 273 motomjete, një rritje me 26% krahasuar me nëntorin. Në dy muajt e fundit të vitit, importet arritën në 16 mijë automjete, me një rritje prej 7% ndaj periudhës së ngjashme të vitit 2024.
Krahasuar me vitin 2019, numri i automjeteve të importuara në 2025 është rritur me 101%. Aktualisht, në Shqipëri qarkullojnë mbi 1 milion automjete, që do të thotë se një në dy banorë ka një automjet. Importet vijnë kryesisht nga Koreja e Jugut, Gjermania, Italia, Kina, Zvicra dhe SHBA.
Një pjesë e madhe e këtyre automjeteve janë të vjetra: mbi 55% e tyre kanë moshë prodhimi nga 8 deri në 15 vite. Ndërkohë, infrastruktura rrugore mbetet e njëjtë, ndërsa automjetet shtohen kryesisht për përdorim personal dhe jo për transport publik.