Ministria e Arsimit dhe Fondacioni Shqiptaro-Amerikan për Zhvillim (AADF) nënshkruan më 6 maj në Tiranë marrëveshjen e bashkëpunimit për krijimin e Agjencisë Kombëtare të Shërbimeve Arsimore (AKSHA). Kjo marrëveshje vjen pas miratimit të ligjit në Kuvend dhe synon transformimin e Qendrës së Shërbimeve Arsimore (QSHA) në një institucion autonom, modern dhe të bazuar në standarde ndërkombëtare.
Ceremonia u zhvillua në Innovation Hub në Piramidën e Tiranës, në prani të kryeministrit Edi Rama, ministres Mirela Kumbaro, kryetarit të bordit të AADF-së Michael Granoff, bashkë-drejtuesve Aleksandër Sarapuli dhe Martin Mata, si dhe ekspertëve nga Cambridge University Press & Assessment.
Ministrja Mirela Kumbaro deklaroi se nisma përfaqëson një qasje të re për reformimin e shërbimeve arsimore, duke i përshtatur ato me ritmet digjitale. Ajo theksoi se QSHA ofron 158 mijë shërbime në vit dhe se agjencia e re do të përmirësojë cilësinë, transparencën, gjurmueshmërinë dhe integritetin, duke u afruar me standardet ndërkombëtare.
Kryetari i bordit të AADF-së, Michael Granoff, nënvizoi rëndësinë e investimit në arsim si themel i së ardhmes së vendit. Ai u shpreh se qëllimi është të sjellë në Shqipëri standardet dhe partneritetet më të mira ndërkombëtare për të ndërtuar institucione të besueshme dhe të qëndrueshme. Marrëveshja fokusohet te administrimi i provimeve kombëtare dhe shërbimeve të tjera kyçe arsimore.