Ministrja në detyrë e Mjedisit, Planifikimit Hapësinor dhe Infrastrukturës, Fitore Pacolli, ka njoftuar nënshkrimin e një Memorandumi Mirëkuptimi me përfaqësuesit e organizatës CNVP, për nisjen e një projekti për rehabilitimin e zonave të degraduara përgjatë pellgut të lumit Drini i Bardhë.
Sipas ministres Pacolli, ky partneritet është hartuar për të forcuar menaxhimin e qëndrueshëm të pyjeve dhe për të mbrojtur pasuritë natyrore të zonës. Projekti përfshin ndërhyrje ekologjike, të cilat konsistojnë në:
- Rehabilitimin e mbi 5 hektarëve tokë të degraduar;
- Mbjellje të reja për ripyllëzimin e zonave të dëmtuara;
- Mbrojtjen e biodiversitetit dhe ekosistemeve natyrore;
- Rritjen e ndërgjegjësimit të komunitetit për rëndësinë e ruajtjes së pyjeve.
Në deklaratën e saj, ministrja theksoi se institucionet do të vazhdojnë të mbështesin iniciativa që garantojnë zhvillim të qëndrueshëm dhe një të ardhme më të gjelbër për Kosovën.