Gjykata Themelore në Prishtinë, Departamenti për Krime të Rënda, ka caktuar masën e paraburgimit prej një muaji ndaj shtatë të pandehurve të dyshuar për kërcënim të votuesve në Graçanicë.
Gjyqtarja e procedurës paraprake ka miratuar kërkesën e Prokurorisë Themelore në Prishtinë. Të pandehurit janë M.D., B.P., Lj.K., M.D., N.R., B.L. dhe S.M. Ata akuzohen për veprën penale “Cenimi i përcaktimit të lirë të votuesve” nga neni 210 i Kodit Penal të Kosovës.
Gjykata arriti në përfundimin se ekziston rrezik real i arratisjes, veçanërisht sepse të gjithë të pandehurit janë edhe shtetas të Serbisë. Gjykata vlerësoi gjithashtu se lirimi i tyre mund të çonte në përsëritje të veprave penale. Prandaj masa e paraburgimit u konsiderua e vetmja masë e përshtatshme për të siguruar rrjedhën normale të procedurës penale.