Pas informacioneve të siguruara në rrugë operative, shërbimet e Komisariatit të Policisë Has, në bashkëpunim me Sektorin për Hetimin e Krimeve në DVP Kukës, ushtruan kontroll në një lokal në qytetin e Krumës. Ambientet ishin përshtatur në mënyrë të paligjshme për ushtrimin e veprimtarisë së lojërave të fatit, duke çuar në ndalimin e shtetasit A. D., 47 vjeç, i cili punonte në këtë subjekt.
Në cilësinë e provës materiale, policia sekuestroi 10 makineri elektronike të markës APEX, një tavolinë pokeri, si dhe fletore me shënime që evidentonin shumat e luajtura nga klientët. Gjithashtu, në vendngjarje u gjet dhe u sekuestrua një aparat celular. Pronari i lokalit, shtetasi E. Q., 34 vjeç, është shpallur në kërkim nga autoritetet, ndërsa vijon puna për kapjen e tij dhe dokumentimin e plotë të veprimtarisë kriminale.
Materialet procedurale janë referuar në Prokurorinë pranë Gjykatës së Shkallës së Parë të Juridiksionit të Përgjithshëm Kukës. Personat e përfshirë në këtë çështje do të hetohen për veprat penale të fshehjes së të ardhurave, mospagimit të taksave dhe tatimeve, organizimit ose ushtrimit të veprimtarisë së lojërave të fatit në kundërshtim me ligjin, si dhe vënies në dispozicion të lokaleve për lojëra të palejuara.