Organizata e Veteranëve të Luftës së UÇK-së (OVL-UÇK) ka mbajtur një takim urgjent për të diskutuar përkeqësimin e klimës së sigurisë pas angazhimit të njësive speciale të policisë në një incident në Skenderaj.
Organizata e cilëson incidentin si "zënkë të zakonshme e pa pasoja të rënda", të porositur nga kryeministri Albin Kurti dhe "banda e tij".
Në komunikatën e saj, OVL-UÇK thekson se strukturat e sigurisë së Kosovës ekzistojnë për të mbrojtur qytetarët dhe rendin kushtetues, e jo për të marrë pjesë në shtetrrethime apo ngjallje frikë.
Ata u bëjnë thirrje pjesëtarëve të Policisë së Kosovës të mos harrojnë se mandati i tyre buron nga Kushtetuta dhe ligjet, e jo nga urdhërat qeveritarë për zbatim skenarësh të tillë.
"Nëse uniforma e Kosovës kthehet në instrument për të vendosur tiraninë e regjimit, atëherë përpos urdhërdhënësve, përgjegjësia bëhet edhe personale", thuhet në reagim.
OVL-UÇK deklaron se do të pengojë me çdo mjet çdo individ apo organizim politik që tenton të vendosë diktaturën, në mbrojtje të lirisë, demokracisë dhe rendit kushtetues.
Organizata rikujton se "diktatura mori fund në qershor të vitit 1999" dhe shton se është e gatshme të sakrifikohet për lirinë dhe shtetin, të ndërtuar mbi mundin e luftëtarëve dhe gjakun e Dëshmorëve të UÇK-së.
"Kushdo që tenton ta vë këtë realitet në provë, le të urdhërojë. Këtu jemi", përfundon komunikata.