Sipas të dhënave të Eurostat, pabarazia në shpërndarjen e të ardhurave në Shqipëri u rrit gjatë vitit 2025. Koeficienti Gini arriti në 30.4, nga 29.8 në vitin 2024. Kjo shifër ishte 1.2 pikë mbi mesataren e Bashkimit Europian, e cila zbriti nga 29.4 në vitin 2024 në 29.2 në vitin 2025.
Të dhënat e INSTAT, të publikuara në tetor përmes Anketës së të Ardhurave dhe Nivelit të Jetesës, tregojnë se koeficienti Gini në Shqipëri u rrit nga 29.83% në vitin 2024 në 30.37% në vitin 2025. Në të njëjtën periudhë, të ardhurat mesatare të disponueshme për frymë u rritën me 10.5%.
Të dhënat në Bashkimin Europian
Brenda Bashkimit Europian, Bullgaria regjistroi koeficientin më të lartë, 37.7, e ndjekur nga Letonia me 35.6 dhe Lituania me 35.5. Në skajin tjetër, Sllovakia kishte treguesin më të ulët, 23.0. Pas saj renditeshin Belgjika me 23.4, Çekia me 24.0, Sllovenia me 24.6 dhe Polonia me 24.9.
Vendet e Ballkanit Perëndimor
Të dhënat më të fundit të disponueshme për disa vende të Ballkanit Perëndimor u referohen viteve të ndryshme. Serbia kishte koeficient Gini 31.9 në vitin 2024, Mali i Zi 31.5 në vitin 2022 dhe Maqedonia e Veriut 30.3 në vitin 2023.
Koeficienti Gini mat pabarazinë në shpërndarjen e të ardhurave të disponueshme në një shkallë nga 0 në 100. Vlera zero nënkupton barazi të plotë, ndërsa 100 përfaqëson pabarazinë maksimale, kur të gjitha të ardhurat përqendrohen te një individ.