Drejtoria e Përgjithshme e Shërbimeve të Transportit Rrugor (DPSHTRR) njofton se pagesa e taksës vjetore të mjeteve të përdoruara apo mjeteve të luksit realizohet tashmë 100% online në platformën e-Albania, pa prani fizike dhe me çdo kartë bankare.
Qytetarët identifikohen si qytetarë ose biznese në portal, zgjedhin shërbimin përkatës dhe klikojnë "Përdor" për të parë automjetet e tyre. Procedura është e thjeshtë, e shpejtë dhe e aksesueshme nga telefoni ose kompjuteri, pa nevojë për dokumentacion shtesë.
Ky shërbim përfshin rreth 770 mijë zotërues mjete dhe sjell përfitime konkrete:
• 282,975,000 lekë të kursyera nga eliminimi i paraqitjes në sportelet e DPSHTRR;
• 56,146 ditë pune të fituara duke shmangur pritjen dhe udhëtimet;
• 23,100,100 km rrugë të shmangura nga udhëtimet mesatare vajtje-ardhje;
• 1,617,000 litra karburant të kursyera me ndikim ekonomik dhe mjedisor.
Shërbimi është rezultat i bashkëpunimit të DPSHTRR, Agjencisë Kombëtare të Shoqërisë së Informacionit (AKSHI) dhe sektorit bankar, për zgjerimin e shërbimeve digjitale dhe reduktimin e burokracisë. Për detaje, qytetarët mund të vizitojnë e-Albania.