Pasuritë e konfiskuara pajisin 7 klasa në shkollën profesionale të Kamëzit

Ministrja e Punëve të Brendshme, Albana Koçiu, Ministrja e Ekonomisë dhe Inovacionit, Delina Ibrahimaj, kryeadministratorja e Agjencisë së Administrimit të Pasurive të Sekuestruara dhe të Konfiskuara (AAPSK), Risena Xhaja, si dhe kryetari i Bashkisë Kamëz, Rakip Suli, vizituan më 30 janar 2026 Shkollën e Mesme Profesionale në Kamëz, më e madhja në vend. Gjatë kësaj vizite, u inauguruan 7 klasa të pajisuara me bazën materiale të nevojshme për zhvillimin e praktikës profesionale.

Duke u ndalur te burimi i këtyre pajisjeve, Albana Koçiu nënvizoi se pasuritë e fituara nga aktivitete kriminale dhe korrupsioni po kthehen në shërbim të komunitetit. Ajo deklaroi: «Po bëjmë të mundur që të gjithë pasuritë edhe asetet që janë vendosur në formë kriminale apo për shkak të korrupsionit, pra aktiviteteve të paligjshme, të gjithë këto pasuri tashmë po kthehen në dobi të komunitetit, në dobi të qytetarëve, të atyre që kanë më shumë nevojë dhe në dobi të shoqërisë».

Delina Ibrahimaj u ndal te nevoja për përmirësimin e shkollave profesionale, jo vetëm në cilësinë e mësimdhënies, por edhe në ambiente, pajisje, laboratorë dhe konvikte. Ajo theksoi se sektori i teknologjisë së informacionit (IT) është çelësi i suksesit për të rinjtë, duke u nevojitur në çdo institucion publik apo privat. «Fokusi ynë është që shkollat profesionale t’i përmirësojmë, jo vetëm në drejtim të cilësisë së mësimdhënies e të shkollimit, por edhe në drejtim të ambienteve e të pajisjeve, të laboratorëve, pasi pa këto të fundit, sado i mirë të jetë edukimi apo cilësia e mësuesve, nuk arrihen dot rezultate», u shpreh ajo.

Këto iniciativa synojnë krijimin e kushteve më të mira për nxënësit, veçanërisht ata që nuk kanë shkolla profesionale pranë vendbanimit.