Grupi Parlamentar i Partisë Demokratike, i kryesuar nga Gazment Bardhi, i ka dërguar një letër zyrtare ambasadave të huaja në Tiranë. Në këtë letër shprehet shqetësimi për zhvillimet në sistemin e drejtësisë, veçanërisht për mbledhjen e Kolegjeve të Bashkuara të Gjykatës së Lartë më 9 prill. Kjo mbledhje synon shqyrtimin e çështjeve lidhur me masën e sigurisë "arrest në burg", ose paraburgim.
Sipas PD-së, nisma është personale e kryetarit të Gjykatës së Lartë, Sokol Sadushi, pa një justifikim ligjor të qartë. Demokratët e lidhin këtë zhvillim me një moment delikat për luftën kundër korrupsionit në Shqipëri, kur disa zyrtarë të lartë dhe ish-zyrtarë ndodhen nën hetim ose masa sigurie për akuza të rënda, si korrupsioni dhe shpërdorimi i detyrës.
Në letër përmendet se aktualisht i vetmi zyrtar i lartë në detyrë në paraburgim është kryetari i Bashkisë së Tiranës, Erion Veliaj. Po ashtu, theksohet se një interpretim i ri ose më i butë i masës së paraburgimit mund të ndryshojë statusin e personave të tillë, duke përfshirë figura të profilit të lartë politik dhe të krimit të organizuar.
PD-ja ngrit shqetësim për deklaratat e fundit publike të përfaqësuesve të pushtetit ekzekutiv, përfshirë kryeministrin Edi Rama, të cilat kritikojnë përdorimin e gjerë të paraburgimit. Këto deklarata, sipas letrës, ngrenë dyshime për ndikim të mundshëm ose presion ndaj institucioneve të drejtësisë.
Opozita kërkon nga ambasadat të monitorojnë procesin në Gjykatën e Lartë, të inkurajojnë transparencën dhe të mbështesin një drejtësi të pavarur e të paanshme. Demokratët nënvizojnë se besimi publik në gjyqësor është thelbësor për stabilitetin demokratik dhe integrimin evropian të Shqipërisë.
Letra thekson se nisma vjen në një kohë kur masat e sigurisë zbatohen prej më shumë se një dekade, sipas vendimit unifikues nr. 7 të vitit 2011.