Grupi i Punës i Partisë Demokratike mbajti mbledhjen e radhës më 1 maj 2026, ku miratoi metodologjinë e punës dhe kalendarin për ndryshimet në Statut. Procesi synon përmirësimin e rregullave të brendshme dhe rritjen e efikasitetit të strukturave drejtuese.
Sipas kalendarit të miratuar:
• Nga 1 deri më 10 maj 2026, çdo anëtar i partisë, i Kryesisë, i Këshillit Kombëtar, i Grupit Parlamentar dhe i Kuvendit Kombëtar mund të paraqesë propozime për ndryshime ose shtesa në Statut. Edhe anëtarët e Grupit të Punës dorëzojnë sugjerimet me shkrim.
• Nga 11 deri më 14 maj 2026, shqyrtimi i propozimeve të paraqitura.
• Nga 15 deri më 20 maj 2026, hartimi i draftit final dhe dorëzimi te Kryetari dhe Sekretari i Përgjithshëm për procedurat statutare.
• Brenda 25 maj 2026, shqyrtimi dhe miratimi nga Kryesia ose Këshilli Kombëtar.
• Më 30 maj 2026, në orën 11:00, Kuvendi Kombëtar merr vendimin përfundimtar.
Puna e Grupit të Punës dhe propozimet mbeten konfidenciale deri në shqyrtimin dhe miratimin nga Kryesia ose Këshilli Kombëtar. Mbledhjet zhvillohen me dyer të mbyllura.
Në Kuvendin Kombëtar pritet të diskutohen edhe çështje të tjera, si situata politike në vend, sfidat e integrimit evropian, mbrojtja e demokracisë dhe shtetit ligjor, si dhe platforma për digjitalizimin dhe modernizimin e partisë.