Një 33-vjeçar nga Kosova është plagosur rëndë me armë zjarri pas një përleshjeje me dy persona në Mynih të Gjermanisë. Ngjarja është shënuar të martën, më 1 shtator, rreth orës 21:45, në kryqëzimin e rrugëve Neuherbergstraße dhe Schleißheimer Straße, në zonën Am Hart.
Sipas informacioneve të bëra të ditura nga autoritetet policore, pas të shtënave, viktima është dërguar menjëherë në spital ku i është nënshtruar një ndërhyrjeje kirurgjikale urgjente. Aktualisht, gjendja e tij është e qëndrueshme dhe ai ndodhet jashtë rrezikut për jetën.
Policia Kriminale e Mynihut ka nisur hetimet për veprën penale të tentativës së vrasjes. Autoritetet kanë publikuar përshkrimin e dy të dyshuarve, të cilët mbeten ende në kërkim pavarësisht ndjekjes policore:
• I dyshuari i parë: mashkull, rreth 20-30 vjeç, i veshur me xhaketë dhe kapelë të bardhë.
• I dyshuari i dytë: mashkull, rreth 20-30 vjeç, i veshur me xhaketë të errët dhe kapelë të gjelbër.
Policia u ka bërë thirrje dëshmitarëve që kanë parë ngjarjen ose kanë informacion mbi të dyshuarit që të kontaktojnë Policinë e Mynihut në numrin 089 2910-0. Për arsye ende të paqarta, konflikti fizik degjeneroi në përdorimin e armës së zjarrit, ndërsa burime të ndryshme mediatike raportojnë detaje të ndryshme lidhur me vendin e plagosjes së viktimës në trup.