Një incident me pasojë plagosjen e një shtetasi të huaj ka ndodhur mbrëmjen e së hënës në qytetin e Durrësit. Policia lokale njoftoi se rreth orës 21:30, në zonën e Shkallnurit, shtetasi me inicialet M. M., 45 vjeç, nga Sllovenia, është përfshirë në një konflikt fizik me disa persona ende të paidentifikuar.
Sipas të dhënave paraprake, 45-vjeçari, i cili dyshohet se jetonte në kushte endacake, ka pësuar dëmtime fizike të dyshuara si të shkaktuara me mjet prerës. Pas ngjarjes, autorët janë larguar menjëherë nga vendngjarja.
I plagosuri është transportuar në spital për të marrë ndihmën e nevojshme mjekësore. Grupi hetimor, nën drejtimin e Prokurorisë, po kryen veprimet procedurale për zbardhjen e plotë të rrethanave të ngjarjes, si dhe për identifikimin dhe kapjen e autorëve.
Përditësime
Burimet e Policisë së Durrësit sqarojnë se sulmi ndaj shtetasit slloven ka ndodhur mbrëmjen e të dielës, duke korrigjuar raportimet e mëparshme që e vendosnin ngjarjen në mbrëmjen e të hënës.