Një ngjarje e rëndë është regjistruar këtë të hënë në qytetin e Pogradecit, ku një 30-vjeçar ka plagosur me thikë bashkëshorten e tij brenda banesës së tyre. Çifti, të cilët jetojnë në Greqi, kishin ardhur për vizitë te familjarët e tyre kur ndodhi konflikti i çastit.
Sipas njoftimit zyrtar të Policisë, rreth orës 13:30, në lagjen nr. 4, shtetasi Renato Xhaja, 30 vjeç, dyshohet se ka goditur me mjet prerës (thikë) bashkëshorten e tij, Bleona Xhaja, 28 vjeçe. Viktima ka marrë plagë në bark dhe në krah. Ajo mori ndihmën e parë mjekësore në spitalin e Pogradecit dhe është jashtë rrezikut për jetën, ndërsa po përgatitet transferimi i saj për në Tiranë për trajtim më të specializuar.
Autori i ngjarjes është arrestuar në flagrancë nga shërbimet e Komisariatit të Policisë Pogradec dhe është shoqëruar në ambientet e komisariatit për kryerjen e veprimeve të mëtejshme procedurale. Grupi hetimor po vijon punën për zbardhjen e plotë të rrethanave të ngjarjes. Burime paraprake bëjnë me dije se dyshohet që 30-vjeçari vuan nga probleme të shëndetit mendor, rrethanë e cila mbetet për t'u konfirmuar zyrtarisht nga hetimet e autoriteteve.
Përditësime
Autoritetet mjekësore po transportojnë me helikopter drejt Tiranës 27-vjeçaren e plagosur për trajtim të specializuar. Policia e Pogradecit sqaroi se viktima është 27 vjeçe dhe jo 28, siç u raportua fillimisht. Hetimet konfirmuan se konflikti ndodhi për motive të hershme.