Të dhënat zyrtare të INSTAT tregojnë se popullsia në grupmoshën 15-29 vjeç ka rënë me 40.4% midis viteve 2019 dhe 2025. Në vitin 2019, ky grup numëronte 681.548 persona, ndërsa në 2025 numri ka zbritur në 405.832 individë.
Në të njëjtën periudhe, numri i të rinjve të regjistruar si të papunë u rrit me 4.6%. Në tremujorin e tretë të vitit 2019, të papunët e rinj ishin 15.021, kurse në tremujorin e tretë të vitit 2025 ky shifër arriti 15.717 persona. Ky zhvillim tregon se presioni i papunësisë mbi të rinjtë nuk është lehtësuar, pavarësisht zvogëlimit të numrit të përgjithshëm të tyre.
Tkurrja e popullsisë së re shpjegohet kryesisht nga emigracioni i lartë dhe rënia e lindshmërisë. Kjo nuk është shoqëruar me përmirësim proporcional të mundësive të punësimit për të rinjtë. Numri absolut i të papunëve të rinj mbetet pothuajse i pandryshuar, çka sugjeron se ekonomia nuk ka integruar plotësisht këtë grup në tregun e punës, edhe në kushtet e mungesës së fuqisë punëtore të re.
Raportet theksojnë mospërputhje mes aftësive të ofruara nga sistemi arsimor dhe kërkesave të tregut të punës. Shumë të rinj dalin nga arsimi me profile që nuk përputhen me nevojat e ekonomisë, sidomos në sektorë që kërkojnë aftësi praktike, teknike ose digjitale.
Gjithashtu, cilësia dhe struktura e vendeve të reja të punës nuk tërheqin të rinjtë. Rritja ekonomike e viteve të fundit është përqendruar kryesisht në sektorë me produktivitet të ulët, punësim sezonal, informal dhe paga të ulëta, duke penguar punësimin cilësor dhe të qëndrueshëm për këtë grupmoshë.