Shqipëria është duke kaluar një proces të shpejtë të plakjes dhe tkurrjes së popullsisë. Sipas shifrave zyrtare të publikuara për vitin 2025, numri total i banorëve është reduktuar me 1.2%, duke shënuar një rënie prej mbi 27 mijë personash.
Tkurrja e moshave të reja
Analiza demografike tregon se grup-moshat e reja janë ato që po zvogëlohen me ritmet më të shpejta. Rënia e popullsisë në grup-moshën 0-34 vjeç me 33 mijë individë brenda një viti është e barabartë me madhësinë e Bashkisë Kurbin. Tkurrjet më të ndjeshme janë regjistruar te të rinjtë:
• Mosha 30-34 vjeç: rënie me 4.7% (6,853 persona).
• Mosha 25-29 vjeç: rënie me 4.4% (5,955 persona).
• Mosha 0-4 vjeç: rënie me 2.3% (2,477 fëmijë).
Këto zhvillime i atribuohen rënies së lindshmërisë dhe ndikimit të vazhdueshëm të emigracionit të popullsisë në moshë produktive.
Plakja e popullsisë
Në kontrast me rënien e moshave aktive, numri i të moshuarve po shënon rritje të ndjeshme. Përveç rritjes së jetëgjatësisë, ky trend ndikohet edhe nga plakja e brezit të njohur si "bumi i lindjeve". Rritjet kryesore janë vërejtur te grup-moshat:
• Mbi 85 vjeç: shtim me 8.3%.
• 75-79 vjeç: shtim me 8.3%.
• 70-74 vjeç: shtim me 6.0%.
Sipas raporteve, pothuajse të gjitha grup-moshat nën 65 vjeç kanë shënuar rënie në numrin e tyre, duke thelluar më tej çekuilibrin demografik në vend.