Bajram Begaj, Presidenti i Republikës, ka përkujtuar sot, në 27-vjetorin e masakrës së Reçakut në Kosovë, martirët e saj në një postim në rrjetet sociale.
Ai shkruan se denoncimi i masakrës 27 vite më parë nga ambasadori William Walker, ish-shef i misionit vëzhgues të OSBE-së në Kosovë, ndërgjegjësoi komunitetin ndërkombëtar për gjenocidin që po ndodhte në Kosovë. Ky ndërgjegjësim, sipas tij, solli Konferencën e Rambujesë, ndërhyrjen e NATO-s, lirinë, shtetin e Kosovës dhe paqen e sotme.
Presidenti Begaj thekson se kjo masakër nuk mund të harrohet dhe thirrja për drejtësi nuk mund të shuhet. Ai shpreh nderim për martirët dhe mirënjohje për SHBA-të, si aleat strategjik të Shqipërisë.
Postimi i plotë i tij është si vijon: “Sot përkujtojmë masakrën e Reçakut dhe nderojmë martirët e saj. Denoncimi i saj 27 vite më parë nga Ambasadori William Walker ndërgjegjësoi komunitetin ndërkombëtar për gjenocidin që po ndodhte në Kosovë. Ndërgjegjësimi solli Konferencën e Rambujesë, ndërhyrjen e NATO-s, lirinë, shtetin e Kosovës dhe paqen që sot e gëzojmë bashkërisht. Kjo masakër nuk mund të harrohet! Thirrja për drejtësi nuk mund të shuhet! Nderim martirëve! Mirënjohje aleatit tonë strategjik, SHBA-së!”.
Më 15 janar 1999, në fshatin Reçak u vranë mbi 45 civilë shqiptarë të paarmatosur. Ambasadori Walker e cilësoi atëherë masakrën si krim kundër njerëzimit. Kosova përkujton sot këtë ngjarje të rëndësishme historike.