Pas ngjarjes së dhunimit të një 17-vjeçareje në Fier, ku u përfshinë tre adoleshente, prindërit e njërës prej vajzave 15-vjeçare reaguan publikisht. Ata sqaruan se për ngjarjen kishin mësuar fillimisht përmes mediave, pas së cilës janë shoqëruar në polici për të dhënë dëshmitë e tyre.
Nëna e adoleshentes, me lot në sy, ka shprehur keqardhje të thellë dhe ka kërkuar falje publike ndaj viktimës dhe familjes së saj. Prindërit bënë me dije se vajza është diagnostikuar 3 muaj më parë me probleme të shëndetit mendor dhe se prej kohësh kanë kërkuar ndihmë pranë institucioneve për trajtimin e saj.
Sipas prindërve, e mitura kishte shfaqur edhe më parë episode agresiviteti, por kërkesat e tyre për mbështetje nuk kanë marrë përgjigjen e nevojshme. Familja ndodhet në kushte të vështira ekonomike, fakt që e bën të pamundur financimin e një trajtimi të specializuar mjekësor dhe psikologjik.
Prindërit i kanë bërë thirrje shtetit të ndërhyjë, duke theksuar se kërkesa e tyre nuk synon shfajësimin e 15-vjeçares për aktin e dhunës. Ata kërkojnë që, krahas përballjes me përgjegjësinë ligjore, të mos neglizhohet nevoja për trajtimin e problemeve shëndetësore të vajzës.