Ngjarja e ndodhur në Fier ka rikthyer vëmendjen te fenomeni i bullizmit dhe dhunës mes të rinjve. Sipas hetimeve, një 17-vjeçare është marrë me forcë nga tri vajza të tjera, njëra 20-vjeçe dhe dy të tjera 15-vjeçe, dhe është dërguar në banesën e njërës prej tyre, ku ndaj saj është ushtruar dhunë fizike.
Pamjet e ngjarjes, të cilat u publikuan së fundmi, tregojnë se agresoret e kanë regjistruar dhunën me celular, duke shfaqur sjellje nxitëse ndaj njëra-tjetrës.
Babai i të miturës, në një rrëfim për emisionin "Me Zemër të Hapur", ka deklaruar se e bija ka pësuar dëmtime të rënda në kokë, flokë të shkulur dhe mavijosje të theksuara në sy. Ai u shpreh se, ndonëse ka paraqitur një kallëzim në komisariat që në muajin qershor, deri më tani nuk janë ndërmarrë veprime konkrete.
Sipas dëshmisë së babait, vajza i njihte autoret përmes shoqërisë së përbashkët. Ato e kishin pritur atë pas përfundimit të një kursi për parukeri, me pretekstin e një sqarimi, për ta dërguar më pas në banesë kundër vullnetit të saj. E mitura ndodhet në gjendje më të stabilizuar pas marrjes së ndihmës mjekësore.