Ngjarja e rëndë ka ndodhur gjatë kthimit të 17-vjeçares nga kursi i parukerisë. Sipas dëshmive të mbledhura, tri bashkëmoshatare i kanë dalë përpara adoleshentes me fjalët “hajde se do sqarohemi”, për ta shoqëruar më pas në një banesë ku edhe kanë ushtruar dhunë ndaj saj.
Viktima fillimisht nuk ka treguar mbi incidentin, duke u shprehur familjarëve se ishte sëmurë, madje është trajtuar edhe me serum. Pas zbulimit të ngjarjes, prindërit e saj kanë kryer denoncimin në polici. Fqinja e të miturës, e cila banon në Kallm të Madh, shprehet se ajo vuan nga depresioni dhe tregon shenja të theksuara frike ndaj zhurmave pas kësaj përvoje traumatike.
Gjyshi i vajzës deklaroi se nuk ka qenë në dijeni të ngjarjes deri në momentin që e ka ndjekur në medie. Aktualisht, familjarët presin përfundimin e hetimeve nga ana e Prokurorisë, pasi janë ndjekur procedurat ligjore pranë autoriteteve kompetente.