Ngjarja e rëndë, e cila është pasqyruar nëpërmjet një videoje të publikuar në rrjetet sociale, ka nxitur reagime të shumta. Sipas rrëfimit të nënës, incidenti ka ndodhur në datën 8 qershor. E mitura, pasi ka përfunduar kursin e parukerisë, është ndaluar nga tri bashkëmoshatare, të cilat e kanë dërguar në një ambient tjetër me pretendimin se kishin një "surprizë", ku më pas e kanë dhunuar.
Nëna ka deklaruar se e ka marrë të bijën nga spitali, ku adoleshentja kishte shkuar për të bërë mjekim (serum) pasi kishte pësuar lëndime në fytyrë. Fillimisht, vajza ka hezituar të tregojë arsyet e dëmtimeve, duke shfaqur gjendje të rënduar emocionale. Pas insistimit të familjarëve, ajo ka pranuar se ishte dhunuar nga tri vajza, me të cilat kishte njohje të rastësishme.
E ëma thekson se e bija vazhdon të jetë e traumatizuar, refuzon ushqimin dhe shfaq shenja frike. Ajo shprehet se ka depozituar kallëzim penal në komisariatin e Fierit një muaj më parë, por pohon se nuk është marrë asnjë masë konkrete për zbardhjen e ngjarjes dhe vënien e autorëve para përgjegjësisë.