Një ngjarje e rëndë është regjistruar në qytetin e Vorës, ku një 15-vjeçare dyshohet se është hedhur nga një lartësi në afërsi të banesës së saj. Si pasojë, e reja është dërguar menjëherë në spital për të marrë trajtimin e nevojshëm mjekësor, ku ndodhet jashtë rrezikut për jetën.
Autoritetet policore kanë nisur procedimin penal në gjendje të lirë për prindërit e vajzës. Sipas hetimeve paraprake, çifti dyshohet se ka ushtruar dhunë psikologjike të vazhdueshme ndaj së miturës, çka besohet se ka shërbyer si shkak për veprimin e saj. Informacionet nga burimet zyrtare bëjnë me dije se kryefamiljari kishte pak kohë që kishte dalë nga burgu, pasi kishte vuajtur një dënim të mëparshëm për akuzën e dhunës në familje.
Hetuesit nuk kanë mundur të marrin ende dëshminë e drejtpërdrejtë të adoleshentes, për shkak të gjendjes së saj të rënduar psikologjike. Në bazë të deklarimeve të mbledhura nga të afërmit, dyshimet kryesore lidhen me debatet dhe mosmarrëveshjet e përsëritura brenda familjes. Policia vijon punën për zbardhjen e plotë të rrethanave të kësaj ngjarjeje.