Pas rënies së zjarrit në Parkun Kombëtar të Lurës, specialistët për Hetimin e Krimeve të Komisariatit të Policisë Dibër referuan materialet në prokurori dhe nisën procedimin penal për tre shtetas të ngarkuar me mbikëqyrjen e zonës. Personat nën hetim janë K. S., 35 vjeç, dhe S. L., 51 vjeç, të dy banues në Dibër, si dhe A. L., 64 vjeç, me banim në Tiranë.
Sipas njoftimit zyrtar të Policisë, këta shtetas akuzohen për veprën penale “Shpërdorimi i detyrës”. Hetimet paraprake dyshojnë se ata nuk kanë zbatuar detyrat për ruajtjen, mbikëqyrjen dhe mbrojtjen nga zjarri të territorit që kishin në përgjegjësi. Si pasojë e neglizhencës së pretenduar, është djegur dhe dëmtuar një sipërfaqe pyjore prej disa hektarësh brenda territorit të parkut kombëtar.
Ndërkohë, autoritetet policore theksojnë se vijon puna intensive për identifikimin e autorit ose autorëve të zjarrvënies, me synim vënien e tyre përpara përgjegjësisë penale. Materialet procedurale i janë përcjellë Prokurorisë së Dibrës për hetime të mëtejshme. Rasti mbetet nën hetim për zbardhjen e plotë të rrethanave të ngjarjes dhe përcaktimin e përgjegjësive ligjore përkatëse.
Përditësime
Situata në Parkun Kombëtar të Lurës mbetet kritike, ndërsa operacioni i shuarjes së zjarrit po vijon me shtim të forcave. Autoritetet angazhuan 120 punonjës të bashkisë, 57 efektivë të Forcave të Armatosura, 15 policë, 15 vullnetarë dhe 9 punonjës të Agjencisë së Zonave të Mbrojtura (AdZM). Dy avionë Air Tractor po mbështesin ndërhyrjen nga ajri. Ekipet e terrenit kanë vendosur nën kontroll perimetrin pranë zonave të banuara, duke eliminuar rrezikun për shtëpitë përreth.