Prokuroria e Fierit ka mbyllur hetimet për shtetasin Milasim Ramaj, i cili u arrestua në tetor të vitit 2025 pas zbulimit të një arsenali armësh. I pandehuri akuzohet për kryerjen e veprës penale "Mbajtja pa leje dhe prodhimi i armëve, armëve shpërthyese dhe i municionit", parashikuar nga neni 278, paragrafi 6 i Kodit Penal.
Sipas dokumentacionit hetimor (procedimi penal nr. 1586), gjithçka nisi kur Ramaj u ndalua nga policia teksa drejtonte automjetin e tij, brenda të cilit u gjet një pistoletë dhe 50 fishekë. Pas kontrolleve të ushtruara në ambiente të tjera të përdorura prej tij, autoritetet gjetën dhe sekuestruan një arsenal prej 12 armësh të tjera zjarri, duke përfshirë:
• 10 automatikë model 56
• 1 armë automatike tip Skorpion
• 1 pistoletë
Në cilësinë e provave materiale u sekuestruan gjithashtu 465 fishekë të kalibrave të ndryshëm, 14 krehëra për lloje të ndryshme armësh dhe 2 silenciatorë. Ekspertiza tekniko-balistike ka konfirmuar se të gjitha armët ishin në gjendje funksionale dhe të afta për qitje.
Prokuroria thekson se ekzistojnë dyshime mbi mundësinë e tregtimit të paligjshëm të një pjese të armëve të sekuestruara. Për këtë aspekt të çështjes, organi i akuzës ka hapur një procedim penal të veçuar, i cili mbetet nën hetim.