Prokuroria e Tiranës u ka drejtuar kërkesa për informacion dhe dokumentacion disa institucioneve dhe palëve të përfshira në procedurat e tenderit për ndërtimin e Aeroportit të Vlorës, në kuadër të një hetimi të hapur lidhur me dyshimet për fryrje fondesh dhe cilësi të dobët të punimeve ndërtimore.
Sipas burimeve pranë organit hetues të kryeqytetit, janë identifikuar disa situata që ngrenë dyshime për fonde të fryra dhe rezultate të dobëta në kryerjen e ndërtimit të veprës. Indicia për hetimet është marrë mbi denoncime, por edhe problematika të konstatuara në pjesën e ngritur të infrastrukturës, përfshirë përmbytjet si pasojë e reshjeve.
Vlerat dhe dyshimet financiare
Prokurori Ndini Tavani po heton për dyshimet se vlerat e investimit janë fryrë përmes falsifikimit të situacioneve dhe punimeve fiktive. Vlera e deritanishme e punimeve, e pretenduar nga kompanitë e koncesionarit "Mabco Constructions SA" e biznesmenit Behgjet Pacolli dhe "2A Group" e Valon Ademi, sipas prokurorisë kap shifrën e rreth 150 milionë eurove. Në fillim të koncesionit ishin parashikuar rreth 104 milionë euro pa TVSH, ose afërsisht 125 milionë euro me tatimin mbi vlerën e shtuar.
Vlera e fryrë e disa situacioneve financiare ka ngritur dyshime për abuzime dhe deklarime shpenzimesh për punë të pakryera. Burime pranë organit të akuzës bëjnë me dije se shifra e pretenduar prej 150 milionë eurosh nuk është reale, por më e vogël.
Problematika në infrastrukturë dhe cilësia e punimeve
Hetimi ka nisur pas denoncimeve, por edhe problematikave të konstatuara në infrastrukturën e ndërtuar. Në raportimet e kontrollit janë identifikuar përmbytje që u shfaqën pas reshjeve të shiut, gjë që ka ngritur dyshime të mëtejshme për cilësinë e realizimit të punimeve. Burime pranë organit të akuzës bëjnë me dije se ka dyshime edhe për cilësi të dobët të punimeve.
Sipas burimeve, prokurori Tavani po kryen veprime të ndryshme hetimore për të dokumentuar problematika që mund të çojnë në evidentimin e shkeljeve ligjore. Kërkesa për informacion janë drejtuar institucioneve relevante dhe palëve të përfshira në procedurat e tenderimit dhe ndërtimit të aeroportit.
Zhvillimet gjudiçore
Lidhur me Aeroportin e Vlorës, Gjykata e Apelit me Juridiksion të Përgjithshëm Tiranë, më 24 dhjetor, ka hequr pjesërisht masën e sekuestros preventive, e vendosur më 17 tetor, në kuadër të një hetimi të regjistruar pas përplasjes mes aksionerëve të projektit.
Ndërkohë, aeroporti ka deklaruar zyrtarisht nisjen e fluturimeve në muajin qershor 2026. Sipas njoftimit zyrtar, Chair Airlines do të jetë kompania e parë ajrore që do të operojë nga Aeroporti Ndërkombëtar i Vlorës, me fluturime direkte drejt Zyrihut, duke filluar nga 26 qershor 2026, dy herë në javë, deri më 23 tetor 2026.