Prokuroria pranë Gjykatës së Shkallës së Parë të Juridiksionit të Përgjithshëm Vlorë ka njoftuar zyrtarisht nisjen e hetimeve lidhur me ndërhyrjet e kryera tre muaj më parë në zonën e mbrojtur Pishë Poro-Nartë. Procedimi penal mban numrin 772 të vitit 2026 dhe përfshin katër vepra penale: "Ndërtimi i paligjshëm", "Dëmtimi i habitateve në zonat e mbrojtura mjedisore", "Prerja e paligjshme e pyjeve" dhe "Shpërdorimi i detyrës". Megjithatë, organi i akuzës bëri me dije se, deri në këtë fazë, në regjistër nuk figuron asnjë person i dyshuar.
Ndërhyrja në këtë zonë u dokumentua në fund të muajit prill nga aktivistë mjedisorë, të cilët denoncuan hapjen e 7.4 kilometrave rrugë të reja, vendosjen e telave me gjemba dhe ndërtimin e urave prej betoni. Këto veprime, të cilat qeveria i cilësoi fillimisht si "punime përgatitore" për projektin "Zvërnec Peninsula", ngjallën reagime nga organizatat PPNEA dhe AOS. Këto zhvillime shërbyen si katalizator për protesta të gjata anti-qeveritare, të njohura si "Revolucioni i Flamingove".
Ky është procesi i dytë hetimor që lidhet me resortin luksoz të lidhur me investitorin Jared Kushner. Më 10 qershor, Gjykata e Posaçme vendosi sekuestrimin e transaksioneve me vlerë 128 milionë euro pas kërkesës së SPAK, e cila po heton për pastrim parash dhe tjetërsim të pronave. Në kuadër të këtij hetimi, prokuroria ka lëshuar urdhër arresti për Artur Shehun dhe 19 persona të tjerë, të dyshuar për pjesëmarrje në skemën e njohur si "Korporata Aruba".
Sa i përket dokumentacionit, kompania zhvilluese "Zvërnec South Adriatic Development" kishte komunikuar me Agjencinë e Zhvillimit të Territorit, duke pretenduar një leje të datës 29 prill 2026. Megjithatë, dokumentet tregonin se leja nuk ishte nënshkruar ende dhe se investitori duhej të përmbushte një sërë kushtesh ligjore. Kryeministri Edi Rama i mbrojti fillimisht ndërhyrjet si zhvillime në tokë private, ndërsa më vonë argumentoi në një intervistë për "Channel 4" se rrugët në zonën e mbrojtur synonin ndihmën për komunitetin lokal.