Prokuroria Themelore në Prishtinë, Departamenti i Përgjithshëm, ka autorizuar Policinë e Kosovës për të ndërmarrë veprime hetimore në lidhje me dyshimet për ndotje të ajrit nga Korporata Energjetike e Kosovës (KEK) në Komunën e Obiliqit.
Prokuroria ka pranuar informacione dhe një video-incizim që tregojnë tym të konsiderueshëm nga oxhaqi i KEK-ut, duke krijuar dyshime për ndotje të ajrit.
Një prokuror i Shtetit ka urdhëruar policinë të kryejë veprimet e nevojshme për verifikimin e fakteve dhe sigurimin e provave relevante.
Rasti trajtohet sipas veprës penale "Ndotja, degradimi ose shkatërrimi i mjedisit", neni 338 i Kodit Penal të Republikës së Kosovës.
Prokuroria Themelore në Prishtinë thekson përkushtimin ndaj mbrojtjes së mjedisit dhe premton veprime ligjore për zbardhjen e plotë të çështjes.
Më herët, KEK-u njoftoi se tymi i madh nga termocentrali Kosova A lidhet me telashe në filtrat e këtij objekti.
Përditësime
KEK-u shpjegoi se ndërprerja e përkohshme në elektrofiltrat e Termocentralit Kosova A u shkaktua nga defekti në qarkun elektrik të ndërprerësve të kompresorëve të ajrit.
KEK-u po kryen ndërhyrje për identifikimin dhe sanimin e defektit, rikthimin e funksionalitetit si dhe masa parandaluese për mbrojtjen e aseteve.