Prokuroria Themelore në Prishtinë ka iniciuar një rast penal ndaj zyrtarëve përgjegjës të Komunës së Prishtinës lidhur me shembjen e dheut në rrugën "Don Shtjefën Kurti" më 30 mars 2026.
Sipas njoftimit zyrtar, Departamenti për Krime të Rënda, konkretisht Njësiti për Hetimin e Krimeve Ekonomike dhe Korrupsion, po vlerëson nëse veprimet apo mosveprimet e zyrtarëve përbëjnë elemente të veprës penale "Keqpërdorim i pozitës apo autoritetit zyrtar", të paraparë në nenin 414 të Kodit Penal të Republikës së Kosovës.
Prokurori i Shtetit ka autorizuar grumbullimin e të gjitha informatave dhe provave shtesë të nevojshme për këtë rast. Prokuroria thekson përkushtimin ndaj ushtrimit të kompetencave ligjore për forcimin e sundimit të ligjit dhe mbrojtjen e interesit publik.
Shembja ka shkaktuar dëme në sistemin energjetik dhe gypat e ujit. Komuna e Prishtinës ka vendosur mbylljen përkohëse të vendpunisjeve për inspektime lidhur me sigurinë publike.
Përditësime
- Ekipet e KOSTT-së dhe KRU Prishtina kanë mbërritur në vendngjarje pas shembjes.
- KOSTT ka nisur punët për rikthimin e energjisë elektrike.