Prokuroria Themelore në Prishtinë, Departamenti për Krime të Rënda, ngriti aktakuzë ndaj tetë personave pas hetimeve dhe analizimit të provave për veprat penale të pranimit të ryshfetit në sektorin privat, keqpërdorimit të pozitës apo autoritetit zyrtar, falsifikimit të dokumentit dhe rasteve të posaçme të falsifikimit të dokumentit.
Të pandehurit F.G. dhe M.G. dyshohen për "Pranimi i ryshfetit në sektorin privat". F.G., në cilësinë e menaxherit në Poligonin “R…”, pranoi 600 euro ryshfet për t’i siguruar një kandidati certifikatë për përdorimin e armëve të zjarrit pa ndjekur trajnimin teorik e praktik dhe pa kaluar provimet. M.G. ndihmoi në këtë veprim duke mundësuar pajisjen e kandidatëve me certifikata jashtë procedurave ligjore.
Të pandehurit S.B., R.M. dhe H.N. akuzohen për "Falsifikimi i dokumentit". Ata, si instruktora në Poligonin “D…” në Prizren, shënuan të dhëna të rreme në dokumente zyrtare dhe nënshkruan certifikata për persona që nuk ishin nënshtruar trajnimeve teorike e praktike.
Ndërkaq, B.H., S.B. dhe B.G. ngarkohen me "Keqpërdorimi i pozitës apo autoritetit zyrtar" dhe "Rastet e posaçme të falsifikimit të dokumentit". B.G., si administratore, plotësoi dhe nënshkroi dokumente në emër të kandidatëve pa praninë e tyre, duke shkelur procedurat.
Prokuroria njofton se këto veprime bien ndesh me Ligjin për Armë dhe udhëzimet administrative në fuqi në Republikën e Kosovës. Rasti do të trajtohet në gjykatë me procedurë të rregullt penale.