Pas një qëndrimi prej rreth tri orësh në bulevardin kryesor të Tiranës, protestuesit kanë nisur një marshim nëpër rrugët e kryeqytetit. Itinerari ka përfshirë zona të ndryshme, duke nisur nga Ministria e Brendshme, Bashkia e Tiranës, zona e Nëntë-Katësheve, Hotel Tirana, Rruga e Kavajës, Myslym Shyri, 21 Dhjetori, Komuna e Parisit, Sheshi Wilson, zona e Librit Universitar, deri te Presidenca.
Lëvizja e qytetarëve ka shkaktuar ndërprerje në trafik, ndërsa protestuesit janë futur mes automjeteve në lëvizje. Atmosfera gjatë marshimit është raportuar si paqësore, pa shënuar përplasje apo tensione. Shumë drejtues mjetesh janë solidarizuar me protestuesit duke u rënë borive, ndërsa disa të tjerë kanë fikur motorët e mjeteve apo kanë dalë nga ato për të përshëndetur turmën.
Protesta, e cila ka si kërkesë kryesore dorëheqjen e kryeministrit Edi Rama, është përmbyllur me një stacionim përfundimtar të protestuesve sërish para ndërtesës së Kryeministrisë.