Prej disa javësh, agjencitë e ndërmjetësimit kanë nisur rekrutimin e punonjëseve shqiptare për t’u angazhuar në industrinë e veshjeve në Itali. Pozicionet kërkojnë gra të moshës 20 deri në 50 vjeç, me të paktën një vit përvojë pune në ndërmarrjet fason në Shqipëri. Oferta përfshin kontratë pune sipas standardeve italiane, pagë neto prej 1,300 euro, 13 paga vjetore, pushime të paguara dhe akomodim, me fabrika të fokusuara kryesisht në Pisa, Bergamo dhe Peruxhia.
Shkaqet e lëvizjes së punëtorëve
Industria italiane e veshjeve dhe këpucëve po përballet me një mungesë të theksuar të fuqisë punëtore. Sipas të dhënave nga Unioncamere dhe Ministria Italiane e Punës, parashikohen rreth 20 mijë hyrje të reja në këtë sektor për tremujorin korrik-shtator 2026, me një shkallë vështirësie për gjetjen e punonjësve prej 56.2%. Një faktor shtesë është Rregullorja Europiane 2024/1781, e cila ndalon shkatërrimin e produkteve të pashitura, duke nxitur prodhuesit italianë të kthejnë proceset e prodhimit pranë vendeve të tyre për një menaxhim më efikas të stokut.
Ndikimi në industrinë shqiptare
Sektori fason në Shqipëri ndodhet përballë një kontrasti të fortë. Përfaqësuesit e industrisë kanë raportuar prej vitesh mungesë të fuqisë punëtore, e cila në vitin 2023 përllogaritej deri në 20 mijë vende të lira pune. Si kundërpërgjigje, shumë fabrika kanë nisur të rekrutojnë punonjës nga vende si Nepali, Filipinet dhe Birmania, si dhe kanë zgjeruar linjat e prodhimit në zonat rurale. Sipas të dhënave të INSTAT, në vitin 2024 në sektorin e tekstileve dhe këpucëve ishin të punësuar rreth 41,2 mijë persona, duke shënuar një rënie prej rreth 8 mijë punonjësish, ose 19.4%, krahasuar me vitin 2022.