Qarkullimi i automjeteve në aksin nacional Librazhd-Qaf Thanë te kthesat e Dragostunjës kryhet me vështirësi këtë të hënë, një ditë pas shembjes së dherave. Vetëm një korsi e gjysmë e rrugës është e hapur, pasi një gur i përmasave të mëdha ndodhet mbi asfaltin e korsisë së bllokuar.
Për më shumë se 10 orë të dielën, mjete të rënda kanë punuar për të shembur skarpatën e dëmtuar dhe për të hapur rrugën. Megjithatë, rreziku vazhdon, veçanërisht për mjetet e tonazhit të rëndë, të cilat nuk mund të kalojnë në korsinë e bllokuar. Një ditë më pas, mungon prania e autoriteteve në vendngjarje për të këshilluar drejtuesit e automjeteve të ulin shpejtësinë.
Banori i zonës Safet Duka, i cili i shpëtoi mrekullisht masivit të rënë së bashku me nënën e tij, tregon për momentet kritike. Ai kërkon dëmshpërblim nga firma që mirëmban rrugën, pasi mjeti i tij është dëmtuar nga gurët e parë të shkëputur nga mali, si dhe masa nga autoritetet për të rikthyer sigurinë në rrugë.
Të dielën, kreu i Autoritetit Rrugor, Ami Kozeli, mohoi që shembja të jetë shkaktuar nga punimet për zgjerimin e koridorit të VIII. Megjithatë, pranë segmentit të dëmtuar shihen mjete që punojnë për gjurmën e re të rrugës.
Ndërkaq, ambientalistët shprehin shqetësim për mbetjet e hedhura në lumin Shkumbin nga punimet.