Një urë hekurudhore përgjatë linjës ekzistuese Elbasan-Librazhd është shembur thuajse totalisht në hyrje të kthesave të Murrashit. Ngjarja u evidentua dhjetëra metra në krah të aksit kombëtar Elbasan-Librazhd, në afërsi të urës së re automobilistike.
Zona ndodhet rreth 12 kilometra larg segmentit të dëmtuar në Dragostunjë, ku më parë u regjistrua shembja e një pjese të infrastrukturës hekurudhore. Sipas pamjeve nga vendi i ngjarjes, struktura e urës ka pësuar dëmtime të rënda, ndërsa toka përreth saj ka çarje dhe rrëshqitje në disa pjesë.
Kjo situatë ngrit shqetësime për stabilitetin e terrenit dhe paraqet rrezik potencial, veçanërisht nëse shembja vazhdon për shkak të lëvizjeve të mëtejshme të tokës. Dëmtimet lidhen me punimet për zgjerimin e rrugës, pjesë e Korridorit Tetë.
Deri tani nuk ka njoftim zyrtar nga institucionet përgjegjëse për situatën, masat e marra apo vlerësimin e rrezikut në zonën përreth. Banorët dhe drejtuesit e mjeteve në segment kërkojnë transparencë dhe reagim të menjëhershëm institucional.