Mëngjesin e të mërkurës, më 25 shkurt 2026, ka nisur zyrtarisht demontimi i urës së Dragostunjës në vendin "Arrat e Gurrës", në aksin kombëtar Librazhd–Prrenjas. Struktura pësoi dëmtime fatale nga një lëvizje e fuqishme e masivit të dheut, që destabilizoi themelet, zhvendosi trupin e rrugës dhe çau shtresat mbajtëse.
Specialistët e terrenit konfirmuan se ura është jashtë funksioni dhe paraqet rrezik për sigurinë publike. Zona ka risk të lartë gjeologjik, me lëvizje aktive të tokës në segmente përreth. Demontimi kryhet me mjete të rënda dhe nën masa të rrepta sigurie, për shkak të paqëndrueshmërisë së terrenit.
Pasojat në qarkullim
Shembja ka bllokuar rrugën, duke izoluar përkohësisht komunitete dhe devijuar trafikun në rrugë alternative rurale, që nuk përballojnë fluksin e lartë të automjeteve. Kjo situatë ka thelluar krizën në këtë arterie lidhëse drejt jug-lindjes.
Ndërhyrje të tjera emergjente
Pas demontimit ka nisur puna për devijimin e rrjedhës së Lumit Shkumbin, me hapjen e një kanali të përkohshëm për të frenuar erozionin dhe parandaluar zgjerimin e dëmeve. Kjo masë krijon kushte për ndërhyrje të mëtejshme infrastrukturore.
Planet për rindërtim
Autoritetet pritet të hartojnë projekt për një urë të re, më të qëndrueshme dhe të përshtatur me kushtet gjeologjike. Kreu i ARRSH-së, Ami Kozeli, premtoi ndërtimin e një rruge provizore prej 1.3 kilometra buzë Shkumbinit, pa afat kohor të saktë, dhe mohoi se fenomeni ka ndodhur për shkak të marrjes së inerteve. Banorët kërkojnë transparencë për afatet dhe garanci afatgjatë.
Reakionet politike
Kryeministri Edi Rama deklaroi se shkak për problemin janë kushtet gjeologjike të zonës. Kryedemokrati Sali Berisha u shpreh se shkak për prishjen e këtij aksi dhe rrugëve të tjera është korrupsioni.