Aksi kombëtar Librazhd - Përrenjas pranë zonës Arrat e Gurrës në fshatin Dragostunjë të Librazhdit është bllokuar plotësisht. Ura në këtë segment ka pësuar dëmtime të rënda dhe është shpallur zyrtarisht e pakalueshme për mjetet dhe këmbësorët.
Sipas Drejtorit të Autoritetit Rrugor Shqiptar (ARRSH), Ami Kozeli, struktura e urës ka humbur parametrat e sigurisë. Dëmtimet janë shkaktuar nga lëvizjet e tokës dhe problemet gjeologjike që kanë prekur zonën prej ditësh.
ARRSH ka marrë vendim për demontimin e urës si masë emergjente për të shmangur rreziqe. Paralelisht, po shqyrtohen zgjidhje provizore dhe ndërtimi i një strukture të re për rikthimin e qarkullimit në këtë aks strategjik.
Përdoruesit e rrugës duhet të ndjekin devijimet e përcaktuara nga autoritetet deri në njoftimin e radhës. Segmenti mbetet i bllokuar.