Këshilli i Ministrave ka miratuar vendimin për deklarimin si pasuri kulturore të paluajtshme të Qendrës Historike të fshatit Dhërmi. Ky akt përcakton njëkohësisht zonën mbrojtëse, duke u bazuar në hartat e zonifikimit dhe koordinatat e Kornizës Referuese Gjeodezike Shqiptare (KRGJSH).
Ministri i Turizmit, Kulturës dhe Sportit, Blendi Gonxhja, sqaroi se ky vendim nuk ndryshon kufijtë ekzistues të zonës, e cila gëzon statusin e qendrës historike që prej vitit 2016. Sipas tij, akti përditëson procedurat për administrimin dhe konservimin e vlerave historike e kulturore, duke siguruar që çdo ndërhyrje në të ardhmen të jetë në harmoni me peizazhin dhe arkitekturën tradicionale.
Në zbatim të këtij vendimi:
• Autoriteti Shtetëror për Informacionin Gjeohapësinor do të publikojë hartat përkatëse në Gjeoportalin Kombëtar.
• Agjencia Shtetërore e Kadastrës ngarkohet me regjistrimin e pronës dhe zonës mbrojtëse sipas legjislacionit në fuqi.
• Përgjegjësia për zbatimin e planit të administrimit u është deleguar Ministrisë së Turizmit, Kulturës dhe Sportit, Ministrisë së Infrastrukturës dhe Energjisë, si dhe Bashkisë Himarë.
Vendimi do të hyjë në fuqi menjëherë pas botimit në Fletoren Zyrtare.