Çmimet e qirave të zyrave në Tiranë vijojnë trendin rritës, veçanërisht në segmentin premium dhe kullat e biznesit në zonën e qendrës. Sipas të dhënave nga agjencia ndërkombëtare Colliers International Albania, çmimi maksimal i qirasë për zyra ka arritur shifrën rekord prej 40 euro për metër katror në muaj në projektet pranë zonës së ish-Sheratonit.
Ndryshime të çmimeve janë vërejtur edhe në komplekse të tjera të njohura të biznesit:
• MET Tirana Building: çmimi ka arritur në 33 euro për metër katror.
• Downtown One: çmimi maksimal është ulur në 25 euro për metër katror, nga 30 euro që arriti në vitin 2025.
• Rritje të çmimeve janë raportuar gjithashtu në objekte si ETC Business Tower, Twin Towers dhe Ring Center.
Stela Dhami nga Colliers International Albania shpjegon se faktorët kryesorë që ndikojnë në këtë ecuri janë rritja e kostove të ndërtimit, zhvlerësimi i euros, zhvillimet e reja urbane dhe kërkesa në rritje për standarde të larta të hapësirave të punës. Përkundër këtyre çmimeve, kërkesa për zyra moderne mbetet e qëndrueshme nga kompanitë që operojnë në zona qendrore.
Krahasuar me vitin 2025, çmimet në Tiranë kanë tejkaluar shumë kryeqytete të rajonit dhe të Bashkimit Evropian. Në 6-mujorin e dytë të vitit 2025, qiraja mesatare në zonat qendrore të Tiranës arriti 30 euro për metër katror, nivel i barabartë me qytete si Barcelona dhe Praga. Në të njëjtën periudhë, qiratë në Tiranë ishin më të larta se në Budapest (25.5 euro), Bukuresht (20 euro), Beograd (18 euro), Zagreb (17.5 euro) dhe Sofje (16 euro).
Sipas të dhënave, Tirana është pozicionuar ndër qytetet më të shtrenjta edhe për çmimet e qirave në zonat sekondare, me një mesatare prej 19 euro për metër katror, duke tejkaluar Beogradin (15 euro), Zagrebin (13 euro) dhe Sofjen (11 euro). Tendenca pritet të vazhdojë gjatë vitit 2026, duke ndikuar në rritjen e çmimit mesatar të qirasë për të gjithë zonën e qendrës.