Të dhënat e fundit nga AirDNA, njësia analitike e platformës Airbnb, për vitin 2025 nxjerrin në pah se zonat bregdetare të Shqipërisë ofrojnë kthimet financiare më të larta nga qiradhënia afatshkurtër. Nga 26.3 mijë njësi banimi të listuara për qira ditore në të gjithë vendin, kryesojnë zonat Vlorë-Sarandë me 39% ose mbi 10.2 mijë njësi, të cilat gjeneruan 57 milionë euro ardhura, rreth 43% e totalit kombëtar.
Dominimi i zonave bregdetare
Në zonën Vlorë-Sarandë, çmimi mesatar ditor gjatë sezonit veror arrin 86 euro, ndërsa fitimi neto lëviz nga 55 deri në 60 euro/ditë në korrik dhe gusht. Mesatarja vjetore e fitimit neto është 37.5 euro/ditë, që përkthehet në rreth 1.125 euro/muaj. Këto zona tejkalojnë kryeqytetin për çmime ditore dhe fitim neto, pavarësisht se Tirana ka volum më të lartë qëndrimesh.
Durrësi dhe Golem zënë vendin e tretë me 19% të njësave (3.8 mijë në Durrës dhe 1.3 mijë në Golem). Çmimi mesatar në Golem është 68.1 euro me fitim neto 34.2 euro/ditë, ndërsa në Durrës 62.4 euro me 33.6 euro neto.
Pozicioni i Tiranës
Tirana zë 20% të njësave ose 5.2 mijë apartamente dhe regjistroi 1.25 milionë net-qëndrime. Çmimi mesatar për natë është 42.4 euro, me fitim neto 25 euro/ditë dhe normë zënie 59%, duke dhënë kthim mujor rreth 750 euro. Rritja e ofertës ka kufizuar ngritjen e çmimeve.
Një përjashtim në Tiranë është Kashari, me fitim mesatar 32.7 euro/ditë dhe kthim mujor 982 euro, falë vilave private dhe eventeve.
Destinacionet e tjera
Shkodra renditet e katërt me 1.2 mijë njësi ose 4.7% të totalit, duke u shfaqur si destinacion në rritje.