Edi Rama, kryeministri i Shqipërisë, ka deklaruar se vendi i tij mbështet idenë e anëtarësimit gradual në Bashkimin Evropian pa të drejta të plota votimi në fazën e parë. Kjo thuhet në një artikull të publikuar sot nga Politico, të shkruar nga Gabriel Gavin, Jakob Weizman dhe Seb Starcevic.
Komisioni Evropian po shqyrton një model anëtarësimi me dy nivele, ku vendet kandidate mund të hyjnë në BE pa të drejta të plota vendimmarrëse fillimisht. Qëllimi është të shmanget vështirësimi i vendimmarrjes unanime në një BE më të madhe dhe të parandalohet bllokimi i politikave nga vetoja individuale.
Aktualisht, anëtarët e rinj marrin menjëherë të drejta të plota votimi, siç ndodhi me Kroacinë në vitin 2013. Propozimi i ri parashikon kufizime fillestare, si mungesa e të drejtës për të bllokuar sanksionet apo çështje të tjera që kërkojnë unanimitet.
Vendet kandidate në Evropën Lindore dhe Ballkanin Perëndimor janë të ndara mbi këtë plan. Disa këmbëngulin për përfitime të plota menjëherë, ndërsa të tjerë pranojnë kushtet e kufizuara për të qenë pjesë e bllokut.
Rama e cilëson këtë qasje si “ide të mirë” dhe shton se Shqipëria, e cila ka hapur të gjitha grupet negociuese, do të pranonte përkohësisht edhe mungesën e një komisioneri shqiptar në Bruksel. Ai thekson fleksibilitetin ndaj vendeve themeluese si Franca dhe Gjermania, duke thënë se ato janë “të rriturit në familje” që marrin vendimet e rëndësishme. Nëse vendet e mëdha gabojnë, faji nuk u takon anëtarëve të rinj.