Enkel Rexhepi, kryetar i Këshillit Kombëtar Shqiptar në Luginën e Preshevës, deklaroi se hapja e një konsullate të Republikës së Shqipërisë në Bujanoc është e domosdoshme për të qenë më afër shqiptarëve të zonës.
I ftuar në emisionin InfoMagazine të Klan Kosova, Rexhepi përshëndeti kërkesën e ministrit Hoxha për hapjen e konsullatës. Ai theksoi se kjo nismë daton nga viti 2019, kur Këshilli Kombëtar Shqiptar kishte kërkuar me ish-ministrin e Jashtëm të Shqipërisë hapjen e saj në Luginë.
Sipas Rexhepit, shtysa e fundit nga ministri Hoxha ka rikthyer çështjen në agjendë. "Është e domosdoshme e kohës që konsullata e Republikës së Shqipërisë të hapet në Luginën e Preshevës dhe të jetë më afër qytetarëve, sepse Lugina e Preshevës është realisht e banuar me shqiptarë në këto troje", u shpreh ai.
Rexhepi nuk dha afate konkrete për hapjen e konsullatës, por nënvizoi se prania konsullore do të lehtësojë shërbimet dhe lidhjen institucionale me qytetarët shqiptarë të zonës.